Handverkarar og kommunur samd um tvey ára sáttmála

Landsfelag handverkaranna, Føroya handverkarafelag og Kommunala arbeiðsgevarafelagið hava gjørt nýggjan tvey ára sáttmála, sum er galdandi til 1.oktober næsta ár.

Sáttmálin varð undirskrivaður seinnapartin í gjár.

Fyrra árið, frá 1.oktober í fjør til 1.oktober í ár, er lønarhækkingin 2,3 prosent.

Fyri seinna árið, sum byrjaði 1.oktober í ár. er nýggj lønartalva gjørd.

Nýggja lønartalvan er stytt soleiðis, at tvey tey fyrstu lønarstigini fella burtur, og stigini annars verða lagað til nýggju lønartalvuna.

Umframt lønarhækking, fáa handverkarar eftirløn av persónligum ískoytum, og dagføringar, og batar eru gjørdir í ásetingum um millum annað vaktarskyldu og barnsferð.