Stórur partur av almenna geiranum letur aftur

Stórur partur av almenna geiranum í USA letur aftur í dag.

Kongressin er ósamd um fíggjarlógina fyri 2019 - serliga er tað fígging av múrinum til Meksiko, sum semja ikki fæst um. Tey tingaðust allan gjárdagin, men um midnáttarleitið máttu tey ásanna, at tey ikki komu á mál.

Men amerikanski forsetin vil hava ein múr, eitt hegn ella okkurt slag av avbyrging, sum skal skilja markið millum USA og Meksiko.

Avleiðingin av ósemjuni er, at stórur partur av almenna geiranum letur aftur fyri triðju ferð upp á eitt ár. Sambært CNN er tað ikki hent seinastu 40 árini.

Fleiri enn 400.000 fólk mugu heim - onnur 400.000 mugu til arbeiðis, men fáa onga løn næstu tíðina. Hon verður goldin við afturvirkandi kraft.

Sambært amerikanska forsetanum hava Republikanararnir gjørt sítt til at fáa eina semju - hann lastar demokratunum og sigur, at bólturin er hjá teimum.