Norskt felag roynir at keypa Faroe Petroleum

Norska oljufelagið DNO hevur nú økt sín ognarskap í oljufelagnum Faroe Petroleum og eigur nú 43.8 prosent av felagnum.

DNO hevur fyrr bjóðað 610 milliónir pund fyri felagið, tað eru góðar 5 milliardir krónur, men stjórnin í Faroe Petroleum metir tað boðið verða ov lágt og at tað undirmetur virðið av norðsjóvarvirkseminum hjá Faroe Petroleum.

DNO keypir ognarlutin hjá smærri eigarum í Faroe Petroleum og eygleiðarar siga, at ætlanin hjá DNO er at fáa meirlutan í felagnum, so teir fáa atgongd til virksemi hjá Faroe Petroleum í Norðsjónum. DNO hevur mest virksemi í Miðeystri í løtuni.