- Tíðindi, mentan og ítróttur
Tvey ár fyri at stinga mann í hálsin við saksi
![](https://kvf.fo/sites/default/files/styles/grein-ovasta-mynd/public/f89823f4571eed27e3783cda0f1b1bb8.png?itok=6RY9YkPu)
Ein 29 ára gamal hevur fingið tvey ára treytaleysa fongsulsrevsing fyri grovan harðskap.
Maðurin, sum annars noktaði seg sekan, tók við dóminum.
Maðurin er dømdur fyri stinga ein mann, sum er føddur í 1962, tríggjar ferðir við saksi um sekstíðina sunnumorgunin 26.august í fjør.
Tann eina stungan, sum var í hálsin, var lívshóttandi, tí blóð hótti við at tippa barkan, so maðurin ikki fekk luft.
Maðurin fekk eisini tvær aðra stungur ella skeinur, aðra í ryggin.
Gamal dómur tyngir
Revsingin fyri slíka brotsgerð er vanliga hálvtannað ár, men av tí tann 29 ára gamli maðurin er dømdur fyrr í einum máli, sum hevur týdning fyri hetta málið, kravdi ákæruvaldið - og fekk eisini - tvey ár.
Føroya rættur játtaði eisini ein part av endurgjaldskravinum.
Hin parturin má avgerast við borgaraligum sakarmáli.
Hendingin var í einum sethúsum í Havn. Teir báðir menninir kennast.
29 ára gamli maðurin varð tikin stutt eftir hendingina, og hann hevur verið í varðhaldi síðani.