Lógin um vælferð kemur fyri forsorgarlógina

Millum nógvu uppskotini, sum koma í løgtingið í dag, er vælferðarlógin hjá landsstýrinum.

Eyðgunn Samuelsen, landsstýriskvinna í almannamálum, leggur fram lógaruppskotið.

Vælferðarlógin kemur í staðin fyri gomlu forsorgarlógina, sum er ein donsk lóg frá 1960’unum.

Hóast nógvar dagføringar eru gjørdar, er forsorgarlógin ikki longur tíðarhóskandi.

Viðlíkahaldsvenjing

Lógaruppskotið, sum kemur í tingið í dag, gevur landsstýriskvinnuni heimild at skipa tænastur, sum hava verið eftirspurdar í nógv ár. 

Eitt nú fær hon heimild til at skipa viðlíkahaldsvenjing í Almannaverkinum.

Venjingin verður partur av endurvenjingartænastuni, sum Almannaverkið stigvíst og miðvíst hevur bygt upp seinnu árini.

Í lógini er eisini ásett, at fólk skulu takast við uppá ráð, fáa skjóta og góða ráðgeving og stuðlast, so tey kunnu liva eitt so vanligt lív sum gjørligt. 

Dentur verður lagdur á fyribyrging, og at veitingar og tænastur skulu virka og eggja til størri sjálvhjálpni.