Dømdur 90 mánaðar fongsul

Í dag er hann dømdur 43 mánaðir aftrat í fongsul fyri at hava roynt á ávirkað vitni, og fyri at hava gjørt lobbyarbeiði fyri ukreinskar politikarar. Tilsamans skal hann nú sita 90 mánaðir í fongsli.

Tað svarar til sjey og eitt hálvt ár, skrivar tíðindastovan, AP. Teir níggju mánaðirnir, sum Manafort hevur sitið í varðhaldi, verða tó drignir frá dóminum. 

Dómurin var longu strangasti dómur nakrantíð eftir at serligi kanningarstjórin, Robert Mueller, fór undir sonevndu russlandskanningina. Mueller kannar, hvørji møgulig sambond eru millum umsitingina hjá Donaldi Trump og russiskar myndugleikar.

Verjar: Leyg ikki við vilja

Manafort stóð á odda fyri valstríðnum hjá Trump. Í heyst kunngjørt Mueller, at Manafort fleiri ferðir hevði logið í rættinum fyri teimum, sum kanna uppáhaldið um, at russarar høvdu ávirkað forsetavalið í 2016. 

Verjarnir hjá Manafort hava tvíhildið um, at Manafort ikki leyg við vilja, men at hann gloymdi fleiri smálutir í málinum. Verjarnir mæltu til lina revsing.

Eitt nú tí teir halda, at Manafort hevur fingið álvarsligar heilsutrupulleikar meðan hann hevur sitið í varðhaldi. 69 ára gamli Manafort hevur millum annað fingið gikt, meðan hann hevur sitið í varðhaldi.