Fólkatingspengar til føroyskan politikk

Starvsfólk hjá Javnaðarflokkinum á Fólkatingi hava verið við í arbeiðinum at menna orku- og umhvørvispolitikkin hjá Javnaðarflokkinum í Føroyum. Hetta hóast peningur til Javnaðarflokkin á Fólkatingi hvørki skal fara til valstríð ella til flokkin í Føroyum.

Sjúrður Skaale heldur tó ikki, at hann saman við Javnaðarflokkinum er farin yvir um mark.

Umframt sína løn fáa báðir teir føroysku fólkatingslimirnir áleið 1,7 mió. kr. árliga. Hesin peningurin skal brúkast til rakstur á skrivstovum teirra og til m.a. ymiskt kunnandi og upplýsandi arbeiði. Men í reglunum um, hvat peningurin má nýtast til, stendur millum annað, at peningurin ikki skal brúkast til valstríð og heldur ikki má blandast saman við tí hjá flokkinum.

Í fjør setti Sjúrður Skaale eitt starvsfólk hjá sær at kanna og lýsa ymisk umhvørvisviðurskifti. Hetta úrslitaði í eini frágreiðing uppá 24 síður, ið síðani er vorðin grundarlag undir orku- og umhvørvispolitikkin hjá Javnaðarflokkinum her í Føroyum.

Sjúrður Skaale heldur ikki, at nakar trupulleiki er í hesum, og sigur, at Javnaðarflokkurin má kunna brúka tað arbeiði, sum verður gjørt á Fólkatingi.

Tað er eingin loyna, at peningaliga eru fólkatingslimirnir væl stillaðir samanborið við løgtingslimirnar og politisku flokkarnar her í Føroyum, og tí er spurningurin, hvørt føroysku flokkarnir, sum hava fólkatingslim, hava ein stóran fyrimun framum hinar flokkarnar.