Løkke til Føroya at stuðla Sambandsflokkinum

Tað hevur vakt ans, at sitandi danski forsætisráðharrin, Lars Løkke Rasmussen, velur at koma til Føroya á vitjan meðan valstríðið til fólkatingið er í hæddini.

Ætlanin er at hava almennan politiskan fund í Østrøm í Havn fríggjadagin klokkan 14, og øll eru vælkomin.Síðan gongur leiðin inn á Glyvrar til Bakkafrost, har aliídnaðurin er á skránni. Vitjanin endar á Koks, har ferðafólkavinnan og matstovuvinnan verða uppi at venda.

Stuðla Sambandsflokkinum

Hans Engell, sum er politiskur viðmerkjari í Danmark, heldur, at endamálið við ferðini er at stuðla systurflokkinum hjá Vinstra, Sambandsflokkinum, at vinna sær ein fólkatingssess.

Danski viðmerkjarin vil tó vera við, at ferðin hjá Lars Løkke Rasmussen eisini avspeglar tað framúr góða samstarvið, sum hevur verið millum teir báðar "reyðu" føroysku fólkatingslimirnar og bláa stjórnarleiðaran í Danmark.

– Viðurskiftini hava ikki verið so góð sum nú seinastu 20 til 30 árini, heldur Hans Engell, politiskur viðmerkjari.