Leiga prins fyri sjey milliónir krónur

Ferjan Prince, sum Strandfaraskip landsins hava leigað til at sigla fyri Smyril, kemur til Føroya 18.september.

Ferjan er leigað í fýra vikur fyri 250.000 kr. um dagin. Leigan í 28 dagar er tí sjey milliónir krónur.

Smyril fer til Odense í dokk tann 20.september. 

Miðað verður eftir at hava Smyril aftur í Føroyum, tá heystfrítíðin byrjar. Hon byrjar 12.oktober.

Manningin á Prince verður útlendsk, meðan ferjan er her. Tó verða nakrir føroyingar við, millum annað á brúnni.

Siglir í Miðjarðarhavinum

Prince siglir annars millum Italia og Grikkaland.

Ferjan er skásett á Kýpros, og hon er bygd í Finnlandi í 1974. Tá kallaðist hon Prinsessan Birgitta og reiðaríið Ragne í Svøríki átti hana fyrstu árini.

Prince hevur havt nógv nøvn og hevur siglt fyri nógv feløg í Skandinavia, so sum Color Line, Stena Line og Scandinavia Ltd.

Síðuskrúvur

Prince tekur á leið líka nógv ferðafólk og líka nógvar bilar sum Smyril.

Prince hevur síðuskrúvur bæði aftan og framman.

Skipið var eitt skifti hotellskip hjá oljuvinnuni í Norðsjónum. Í tí sambandi vóru umstøðurnar hjá ferðafólki dagførdar.

Prince fer at sigla tvær ferðir um dagin á Suðuroyarleiðini.