Smyril í vanda fyri at verða lagdur

Smyril fer í dokk í Odense í morgin. Játtaðar eru 26 milliónir í fíggjarlógini 2019 til endamálið. 

Hetta er fyri at lúka lógarásett krøv frá klassanum, so skipið kann vera í sigling. Men 26 milliónir krónur eru ov lítið sambært tilboðnum frá donsku skipasmiðjuni.

Kostar meira

Strandfaraskip landins upplýsa, at dokkingin fer at kosta 29,5 milliónir krónur. Um krøvini frá klassanum ikki verða fylgd, kann Smyril verða lagdur, til krøvini eru fylgd. 

So fyri at fáa Smyril aftur til Føroya er neyðugt at játta 3,5 milliónir krónur, siga Strandfaraskip landsins.

Pengarnir, 29,5 milliónir krónur, fara til sjálva dokkingina, tað er at gera neyðugar umvælingar og neyðugt viðlíkahald, og til at leiga avloysaraskip fyri Smyril.

Prince, sum avloysir Smyril, kostar sjey milliónir krónur at leiga. 

Frávik

Jørgen Niclasen sigur, at hann fer at biðja løgtingið um frávik frá tíðarfreistunum, so uppskotið um eykajáttanina kann avgreiðast í morgin.

Hitt uppskotið um eykajáttanarlóg, tað stóra, kemur um eina viku, helst sama dagin, sum uppskotið um fíggarlóg fyri 2020 verður lagt fram.

Tað verður mánadagin 30. september. Landsstýrið hevur ikki gjørt nýtt uppskot um fíggjarlóg, men hevur framskrivað fíggjarlógina fyri 2019.

Broytingarnar verða so gjørdar í Fíggjarnevndini. Tingfundurin í morgin er klokkan tíggju.