Meira peningur játtaður til kanningar

Búnaðarstovan hevur saman við landsdjóralæknanum avgjørt, at stuðulin verður veittur til at kanna ílegur hjá brundum og heilan hjá eldri óm eftir sama leisti sum í fjør.

Endamálið við ílegukanningunum er at útrudda íleguna við lágum mótstøðuføri móti ridluskriða við bara at gera brundar upp við høgum mótstøðuføri í Fugloy, Eysturoy og Streymoy, har ridluskriði er staðfestur. 

Gera kanningar í fýra oyggjum

Endamálið við at kanna heilan hjá eldri óm er at staðfesta, um oyggjar eru, sum kunnu metast at vera fríar fyri ridluskriðasmittuna. 

Staðfesta kanningarnar, at ein oyggj ikki hevur smittuna, verður ikki neyðugt at gera ílegukanningar at ala seyðin til hægri mótstøðuføri.

Heilakanningar verða gjørdar í Fugloy, Koltri, Hesti og Nólsoy, sigur Heilsufrøðiliga starvsstovan.