Skrá Sjón

Sofia Åhman leiðir heimafimleikin í SVT.
Hesa ferð er fokus á styrki.

Í "Snipp snapp" eru teknifilmar, ið eru ætlaðir smáum børnum. Hesaferð eru teknirøðirnar Grísa-Peppa, Eingilina Ballerina og Uki.
"Snipp snapp" er hvørt mikukvøld, hóskvøld, leygarkvøld og sunnumorgun.

Urtagarðurin er í kvøld og vitjar Karl A. Thomsen, sum býr í Syðrugøtu. Hann hevur ikki bara stóran áhuga fyri trøum og blómum, hann eygleiðir eisini og tekur myndir av sjáldsomum fuglum, sum vitja í urtagarðinum. Og so hevur hann eisini eina firvaldarfellu, og spennir út firvaldar, sum eru sjáldsamir um okkara leiðir.

Gjørt sendingina: Bergljót D. Hentze og Ragnar C. Joensen.

"Pitsa". Italskir smakkir skulu á borðið, tá Paul Svensson stendur framman fyri fyrsta góðkenda pitsubakara í Skandinavia. Anne Lundberg og Paul Svensson eru á matferð í Skåne, tey leita eftir ókendum grønum rávørum. Á leiðini bjóða bestu kokkar í Svøríki sínar egnu yndisrættir.

Reinaldar ella rasukettur eru dýrar. Men hvussu veit eg, at kettlingurin er frískur, tá eg keypi hann? Hesa ferð er sendingin um kettu.
Djóralækni: Oskar Nilsson.
Programmleiðari: Sofia Rågenklint.

Mestsum onki mark er fyri, hvat tú kanst brúka tað til. Men hvat er tað í roynd og veru, sum ger eggið so framúr? Kristin Olsen hevur allierað seg við ein kokk - og saman fara tey at kanna kulinarisku møguleikarnar við egginum.

Urtagarðurin er við at líkjast, men megna tey at fáa alt liðugt til veitsluna fyri sisiliansku vinunum - og verður garðurin soleiðis, sum Marie og Bill droymdu um av fyrstan tíð? Pernilla Månsson Colt hyggur at úrslitinum.
6. partur av 6.

Sofie roynir seg á fyrsta sinni sum múrari, tá rivur og hol skulu fyllast. Og múrarin Boris er ovfarin av spartlievnunum hjá Sofie, men amboðini kundu verið betur handfarin. Sofie og familjan gista fyrstu ferð í húsunum, hóast byggiórudd.
Sesong: 2.
Partur: 2.
Framl.ár: 2023
Framl.: Bermuda
Framl. fyri: TV 2 DK

Nýggj donsk røð fylgir 5 donskum kvinnum, sum vísa okkum eitt Dubai, har lívið ikki einans bjóðar sólskin og skattafrælsi, men eisini langar arbeiðsdagar, fíggjarligan ótryggleika og púra vanligan gerandisdag. Í tí gøtuni, har Ditte býr, tá hon er í Dubai, er Halloween, bæði abbin og filippinska arbeiðsgentan hjálpa til. Lene-Marie var forelskað í Dubai. Nú situr hon ein gráan vetrardag í Svendborg við 2-ára gamla soni sínum, sum saknar arabiska pápan í emiratunum.

Samrøða við Pál Vitalis Joensen, sum hevur svomið kapp á olympisku leikunum tvær ferðir og er eitt av okkara størstu ítróttafólkum yvirhøvur. Vit hava ikki hoyrt nógv til svimjaran seinastu árini, men Kristi himmalsferðardag helt hann fyrilestur, har hann greiddi frá sínum ítrótta upplivingum. 3-2 hevur hitt úrmælingin úr Vági, sum í dag býr í Havn saman við familju síni.

Føroyska landsstýrið fær sum vátan vøttin á fyrsta fullveldisfundinum við donsku stjórnina í Keypmannahavn í mars 2000. Danska stjórnin leggur nú meinbogar í vegin fyri føroysku ætlanunum. Skiftistíðin skal vera so stutt, at føroyingar fara at himprast at atkvøða fyri fullveldisætlanini á einari fólkaatkvøðu. Landsstýrið og danska stjórnin samráðast við jøvnum millumbili, men langt er millum partarnar. Fýra fundir eru í alt í 2000 - allir í Keypmannahavn. Eingin semja fæst, og til endans slitnar. Nú stendur á í fullvedissamgonguni. Ósemja er innanhýsis um kósina. Tað tekur at losna millum stóru flokkarnar í samgonguni - Fólkaflokkin og Tjóðveldisflokkin. Annar sýtur at víkja frá upprunaligu stevnuni, hin talar fyri eini hóvligari kós. Tað stendur til at bresta, men til endans ganga teir saman aftur. Neyðsemjan ber í sær, at farast skal undir eina skipaða yvirtøkuætlan - heimastýrislógin skal tømast. Men brátt taka onnur, myrk skýggj seg upp á luftini, og nú býðist ikki bøtur hjá fullveldissamgonguni. Føgru hugsjónirnar um einar frælsar Føroyar syndrast so líðandi. Og tá ið danska kongshúsið í 2005 vitjar í Føroyum er alt aftur, sum tað plagdi at vera. Niðurstøðan hjá føroyingum tykist vera sum hjá Rasmusi Effersøe í 1895: best man vera sum er.

Suni Merkistein og Jógvan Eli Dam leggja til rættis