Skrá Sjón

Beinleiðis sending av Vaglinum í Havn við innsløgum og gestum í studio. Vit eru úti á gøtunum og lodda dýpið, hitta fólk og práta um leyst og fast í sambandi við ólavsøkuna. Vertir eru Elin Michelsen og Tróndur Olsen.

Í røðini verður hugt at Føroyum og føroyingum úr einum nakað øðrvísi, og kanska eitt sindur meira skemtiligum sjónarhorni enn vanligt. Her møta vit tjóðskaparmanninum Haraldi, konuni Pernille, og dóttrini Søs, sum øll búgva í Keypmannahavn. Her er tann illi Sofus, tann einsami Niels, tann samkyndi Kjartan, tey lekru Remi og Rosely, teir smørtu reportararnir Olgar og Randi ? og mong, mong onnur. Væntandi fara tey flestu at kenna seg aftur í onkrum av hesum persónum, sum so ella so mynda Føroyar anno 2008.

Tað er Sjúrður Skaale, sum hevur lagt sendirøðina til rættis.

Ein partur í matrøðini Foytar Greyðir. Kári og Tróndur kaga niður í tiltiknu kókibókina "Matur & Matgerð", og fara út í Tindhólm, til Mikladals og inn til eina gamla konu at matgera.

Kári Sólstein og Tróndur Vatnhamar leggja til rættis.

Fáum unnist at gerast so avhildin og fólkslig, at tey verða nevnd bara við fornavni. Nólsoyingurin Ove Joensen er eitt undantak.

Ove var maðurin, sum í 1986 útinti stóra bragdið at rógva einsamallur úr Føroyum til Danmarkar í lítlum árabáti. Fólk vóru ovfarin og hugtikin. Mannfjøldin, sum fagnaði Ova, tá hann kom at landi á Longulinju, var tann størsta, sum nakrantíð var savnað í Keypmannahavn at heiðra einstøkum persóni.

Frá hesum degi kollveltist lívið hjá Ova. Ansurin fyri honum var ovurstórur, og hann varð dyrkaður sum hetja, hvagar hann fór. Hann hevði ilt við at fóta sær eftir harða róðurin, og fekk ongantíð ein vanligan gerandisdag aftur.

Ove var ævintýrari, og lívið hjá honum kann taka seg út sum eitt stórt ævintýr, men víðagitni nólsoyingurin var ein samansettur persónur, sum fá komu at kenna heilt væl.

Tey, sum kendu hann best, hitta vit í sendingini. Tey hjálpa okkum at lýsa mannin, sum øll eru upp á fornavn við, men sum ógvuliga fá veruliga skiltu, og sum doyði í bestu árum líka so gátuført, sum lív hansara kann tykjast mongum at hava verið.

Suni Merkistein og Hans Petur Hansen leggja til rættis.

Ólavsøkudag fara vit upp á gólv við Orminum langa og Viljormi Kornus. Heini Holm skipar Ormin langa og Jónleif Johannesen skipar Viljorm Kornus. Talan er um nýggjar upptøkur úr Sjónleikarhúsinum í Havn frá mai 2025, har 10 dansifeløg dansaðu og kvóðu saman.