Skrá Sjón

Beinleiðis sending av Vaglinum í Havn við innsløgum og gestum í studio. Vit eru úti á gøtunum og lodda dýpið, hitta fólk og práta um leyst og fast í sambandi við ólavsøkuna. Jákup Dahl og Marin Eidesgaard eru vertir.

Í luftini er sjónvarpsrøð við tónleiki og práti úr Kringvarpshøllini.

Í sendingini tosa vit við fløguaktuellar tónleikarar, og tey framføra nøkur løg av nýggjastu útgávuni. Hesa ferð er Jasmin gestur.

Sendingin er gjørd í samstarvi við Faroe Music Export.

Í "Snipp snapp" eru teknifilmar, ið eru ætlaðir smáum børnum. Hesaferð eru teknirøðirnar Labbaliðið, Sára og Dunna og L fyri lomb.

Útgávan hjá Terja & Føstufressum í 1990 verður hildin at vera mest selda føroyska tónleikaverk, og er kosin at vera aldarinnar føroyska plátuútgáva. Kortini gingu tjúgu ár, áðrenn manningin savnaðist aftur at gera eina nýggja fløgu. Í sendingini fáa vit søguna um reynadreingin Terja, sum blaðungur fer at skriva sangir, og vinmenninar í grannalagnum kring Pedda við Steinsgøtu, ið longu sum smádreingir mannaðu orkestur og mentust til nakrar av dugnaligastu tónleikarunum í landinum. Vit eru í hølunum á teimum, nú teir hittast aftur og fara í studio at taka upp sangir til nýggja útgávu. Vit eru við teimum undir venjing og fyri og eftir stóru útgávukonsertina í Norðurlandahúsinum í fjør vár. Vit fáa eisini at vita, hvussu nakrir av kendastu sangunum hjá teimum eru vorðnir til.

Sendingin varð fyrstu ferð send í apríl mánaða 2012

Suni Merkistein og Hans Petur Hansen løgdu til rættis.

Tað var í sambandi við Mentanarnáttina á sumri 2017, at Tórshavnar Big Band hevði konsert í Norðurlandahúsinum og í Løkshøll við føroyskum sangum, sum eru vorðnir fólkaogn. Konsertin tók støði í sjónvarpssendirøðini "Minnist tú enn", sum Kringvarpið sendi fyri nøkrum árum síðani. Magnus Johannesen setti løgini út fyri orkestrið. Gestasangarar eru Kristina Bærentsen, Guðrun Sólja Jacobsen, Signar í Homrum, Sámal Ravnsfjall og Carlsen systrarnar. Sigurður Flosason stjórnar orkestrinum, og Suni Merkistein, sum gjørdi sendirøðina "Minnist tú enn" saman við Hans Peturi Hansen, er frásøgufólk á konsertini.

Føroyskur dansur í Sjónleikarhúsinum í Havn. Kvæðini eru Ribolt er en greveson, Kristian Jacobsen skipar og Fruntatáttur, Anfinn Johannesen skipar. Upptøkan er frá 2025.

Í tretivu ár var Niels Juel Arge tann karismatiski stjórin á føroyska útvarpsloftmiðlinum. Kortini dámdi honum betur á dekkinum enn á brúnni. Hann var tann føddi frásøgumaðurin, sum vildi fortelja. Hann skapaði sjálvur føroysku útvarpsreportasjuna og ítróttafrásøgnina. Hann var røddin, sum allir føroyingar vuksu upp við í 60- og 70-árunum. Hann var virdur og avhildin. Hann ráddi fyri borgum á Bryggjubakka, og kravdi, at hini fylgdu honum. Tignin var so bjørt, at summi firnaðust honum. Hann var ímyndin av Útvarpi Føroya. Heilhugaður virkaði hann fyri einum føroyskum útvarpi, tó at umstøðurnar vóru smáar og politiski viljin lakur. Hann tók stig til eydnuspælið V4, sum fíggjaði eitt nútímans útvarp. Tá ið hann legði frá sær í 1990, var útvarpið so nógv framfarið, at tað var ikki at líkna við tann stovn, sum hann tók við leiðsluni á tretivu ár frammanundan. Í sendingini fáa vit søguna um havnardrongin, sum kendi loftmiðilin sum sítt kall, og sum gjørdist kendasta røddin í landinum. Kona, børn og fyrrverandi útvarpsfólk siga okkum søguna um Niels Juel.

Suni Merkistein og Hans Petur Hansen leggja til rættis.