Færri næmingar velja 10. flokk

Rannvá Egholm
rannva@roddin.fo

Í nøkrum kommunum í landinum er mann byrjaður at samla 10. floksárgangin, og í Tórshavn hevur mann t.d. Nám X. Hetta hugtakið byrjaði í 2010, og í 2011 vóru tað 215 næmingar, ið valdu Nám X. Enn eru nógvir næmingar, ið velja tíggjuna árið í fólkaskúlanum, men undirtøkan er minkandi. Hetta skrivar skulabladid.fo í dag.

Í Klaksvík samlast allir 10. flokkarnir í Norðoyggjum, og í Fuglafirði samlast næmingar úr Fuglafirði, Gøtu og Leirvík. Á smærri skúlunum hava tey eisini tíggjunda flokk, men til dømis Sørvágs skúli hevur einans 7 næmingar, og Vestmanna skúli einans 9 næmingar í 10. flokki.

Í ár ganga 477 næmingar í 10. flokk, tað er 63.7% av næmingunum, sum gingu í 9. flokki í fjør. Fyri trimum árum síðani vóru tað 69% av 9. floks næmingunum, sum valdu at halda fram í 10. flokki.

Samstundis hevur mann sæð ein týðiligan vøkstur á næmingatalinum í Hoydølum, og í ár varð enn einaferð sett met. Færri næmingar velja nú 10. flokk og velja heldur at fara beinleiðis í miðnámsskúla.