Lou Reed andaðist í gjár

Í gjár var ein sorgardagur fyri nógvar tónleikafjepparar. Kendi sangarin, sangskrivarin og gittarspælarin úr The Velvet Underground, Lou Reed, doyði 71 ára gamal. Deyðsorsøkin er ókend, men í mai var hann undir skurviðgerð og fekk eina nýggja livur. 

Lou Reed stovnaði saman við John Cale bólkin The Velvet Underground í 1964, sum tá var sera umstríddur og bjóðaði normunum innan rokktónleik av. Bólkurin eydnaðist ikki væl kommersielt og seldi einans 30.000 eintøk av fyrstu fløguni "The Velvet Underground & Nico". Bæði fløgan og bólkurin fingu kortini kult-status seinni, og The Velvet Underground verður í dag mettur at vera í millum teir mest umráðandi bólkarnar frá tí tíðini. 

Í 1970 fór Lou Reed sína egnu leið og gav millum annað kendu løgini "Take a Walk on the Wild Side" og "Perfect Day" út. Hann hevði fýra útgávur við The Velvet Underground og meira enn 20 soloútgávur á baki, tá hann andaðist.