Stuttfilmurin Ljós frumsýndur í kvøld

Daniel Jensen er 21 ára gamal og búsitandi í Aarhus, har hann lesir lívfrøði á universitetinum. Hann hevur annars búð í Føroyum meginpartin av lívi sínum.

- Líka síðani eg slapp at lána filmsmyndatólið hjá foreldrum mínum í 4.-5. flokki, havi eg gjørt filmar/sketches og nomið mær meira og meira kunning um filmsgerð, fortelur Daniel, sum hevur ætlanir at koma inn á Filmsskúlan í Keypmannahavn.

Stuttfilmurin Bagland, sum Daniel eisini hevur gjørt, varð valevni til besta stuttfilm á Copenhagen Film Marathon. Nú er tað so nýggi stuttfilmurin Ljós, sum verður at sýggja á fyrsta sinni.

- Eg vil helst ikki avdúka ov nógv, men stuttfilmurin snýr seg um ein drong, ið eitur Heini og býr í Danmark. Tá pápi hansara doyr, fer Heini fyri fyrstu ferð í fimm ár heim aftur til Føroyar. Hann kennir seg kortini ikki heima her, og hann er mestsum vilstur á lívsins leið. Í Føroyum henda nøkur ting, og heini verður noyddur at velja hvørja lívsleið, hann nú skal fara, greiðir Daniel frá.

Frumsýningin verður í samkomuhøllini í Studentaskúlanum í Hoydølum  í kvøld kl 19.30. Kostnaður at sleppa inn er 20 kr.