Nýggj fløga frá Michael Jackson: Apríl, apríl?

Í dag hevur plátufelagið Epic Records útsent tíðindaskriv um, at ein nýggj fløga frá Michael Jackson er á veg. Tíðindini eru send út umvegis offisiellu heimasíðuni hjá sangaranum sum doyði í 2009.

Samstundis sum nógvir fjepparir gleðast um boðini, eru eisini summi ið stúra fyri, at eingin fløga er á veg. Í tíðindaskrivinum stendur nevniliga, at fløgan kann bíleggjast frá 1. apríl. Tí óttast fjepparir, at talan er um eina aprílsøgu.

Fløgan, sum sigst at kunna bíleggjast frá í morgin, kemur út 13. mai. À henni eru 8 løg ið eru framleidd úr gomlum upptøkum. Tað var stjórin í plátufelagnum Epic Records, sum fann upptøkurnar í heiminum hjá Michael Jackson, aftaná hann doyði.

Fløgan eitur XSCAPE, og tað eru Timbaland, Rodney Jerkins, Stargate og John McClain sum hava framleitt hana, skrivar plátufelagið í tíðindaskrivinum.