10 ára gamlir festivalgestir: G! er ikki bert ein festivalur til ung og vaksin

-Tað er mega stuttligt á G! Tónleikurin og maturin er góður, men tað besta eru altso teir heitu pottarnir, har eru vit næstan allatíð.

Blaðungu dreingirnir vitja G! festivalin saman við foreldrum teirra, og siga, at festivalurin hevur eina rúgvu at bjóða familjum.

-Vit eru farin á G!, fyri at hugna okkum saman við familjuni og vinum. Men sjálvandi eisini fyri tónleikin og festivalin sum heild.

Meðan eg siti og práti við dreingirnar, kemur mamma teirra við lekkrum festivalmati. Tá sigur ein teirra:

-Yes! Eitt tað besta á G! er maturin, deiligt at fáa okkurt annað, enn tað vit fáa heima.

Foreldrini at dreingjunum lata eisini avbera væl at festivalinum, og halda eisini, at G! er egnað familjum við børnum.

-Tað eru flest ung og vaksin á G!, men hóast alt eru fleiri barnatiltøk fyriskipað. Dreingirnir elska lívliga huglagið á G!

Soleiðis sigur mamma teirra um festivalin.

Sambært ungu festivalgestunum og foreldrum teirra, er G! als ikki bert festivalurin til ung og vaksin, men sanniliga eisini ein hugnaligur familjufestivalur.

Sí myndirnar niðanfyri av børnum og familjum á G!

Hanna Vang hevur tikið myndirnar.