- Kenslan var ótrúliga góð

Mong eru tey, sum hava snakkað um føroyska bragdið í Landskrona á sinni, tá ið Føroyar vunnu 1-0 á Eysturríki. Gjárkvøldið, 24 ár eftir Landskrona, hendi enn eitt bragd í føroyskari fótbóltssøgu, tá Føroyar vunnu 1-0 á Grikkalandi.

Ein av evnaríku spælarunum er miðvallaleikarin, Brandur Hendriksson Olsen, ið er 18 ára gamal og sostatt yngsti leikari á liðnum. Hann spælir við danska liðnum FCK. Brandur sigur soleiðis um dystin:

Hvussu var kenslan, tá ið dómarin bríkslaði, og dysturin var liðugur?

- Kenslan var ótrúliga góð. Hetta er eitt tað stórsta føroyska bragdið í søguni, og at vera ein partur av tí, er sera stuttligt. Men viktigasta av øllum er, at vit ikki føla okkum mettar av hesum. Hetta er eitt stórt úrslit, men vit eru við fyri at vinna enn fleiri fótbóltsdystir, og tað er næsta mál hjá okkum.

Hvussu er tað, at vera yngsti leikari á landsliðnum - og so at spæla ímóti toppliði sum Grikkaland?

- Hetta hevði eg ikki droymt um fyri einum ári síðani, men at standa her sum 18 ár, og hava vunnið ímóti Grikkalandi, er ótrúliga stuttligt! Mann følir eitt víst álit, at verða settur at byrja sum 18 ára gamal. Eg eri sera glaður fyri, at hava fingið möguleikan á landsliðnum, og vónandi verða tað nógv fleiri dystir og nôgv góð úrslit framyvir, sigur Brandur, ið er sera fegin um góða úrslitið.