Nú fáa vit depressión mitt í 20’unum

Fyrr var depressiónin mest vanlig millum tey, sum høvdu hús, arbeiði og familju. Í dag er vanligt, at lesandi fáa depressión.

Í 1950’unum var miðalaldurin fyri danir, sum fingu depressión fyri fyrstu ferð, 40 ár. Í dag er miðalaldurin umleið 25 ár. Hetta sigur Poul Videbech, ið er professari á Aarhus Universitetshospital, við DR.

Strongd og høg krøv

- Hendan gongdin merkir, at av tí vit liva longri í dag samanborðið við fyrr, so hava vit fleiri liviár at gerast depremerað í. Tí depressiónin er nevniliga ofta afturvendandi, sigur Poul Videbech og heldur á fram:

- Trupulleikin í dag er, at krøvini eru ov høg. Um tú ikki ert virkin 120% á arbeiðsplássinum, so verður tú útistoyttur ella sjúkrameldaður. Tað eru nevniliga strongd og høg krøv á arbeiðsplássinum, ið hava viðført, at depressiónin er so útbreidd í dag í mun til fyrr. Hetta er ein sera ørkymlandi støða, samfelagið er í.

Hann leggur eisini afturat, at tað ikki eru upprópini og opinleikin um depressión, ið eru grundin til lága miðalaldurin, men harafturímóti strongd og høg krøv.