Earth Hour - sløkk ljósið í ein tíma

28. mars verður heimsins størsta umhvørvisátak: Earth Hour. Átakið gongur út upp á at eggja býum, kommunum, arbeiðsplássum, felagsskapum og privatum um at sløkkja alt ljós í ein tíma.

Tað er millum 20:30 og 21:30, at hús og býir fara í svart. Hetta fyri at varpa ljós á tær stóru umhvørvisavbjóðingar, heimurin stendur fyri. Sløkta ljósið er eitt symbolskt róp til bæði politikarar og hin einstaka um at virka fyri at basa veðurlagsbroytingunum.

Tað er umhvørvisstovnurin, WWF (World Wide Fund for Nature), sum hevur tikið stig til tiltakið, og var tað fyrstu ferð í Sidney, Avstralia, í 2007. Hetta eggjaði fleiri býum og londum til at gera tað sama, og Earth Hour er í dag eitt heimsfevnandi tiltak. Í fjør luttóku 162 lond í Earth Hour, sum hevur verið tað mesta higartil.

Tað er sera lætt at luttaka í hesum altjóða átakinum, sum er til frama fyri okkara jørð – liv uttan ljós í ein tíma leygardagin 28. mars klokkan 20:30.