Gestamiksið: ÜBERNÖRD

Maðurin, sum goymir seg aftan fyri navnið ÜBERNÖRD, er Knút Háberg Eysturstein, sum vit kenna væl frá føroyska tónleikapallinum. Um nýggjasta miksið, sum hevur heitið "Spooky Surf Mix", sigur hann soleiðis.

- Miksið er sett saman við íblástri úr míni allahalgannaaftansdisking í Sirkus herfyri, har eg nærum bert spældi horror/halloween tónleik.

- Harumframt havi eg í seinastuni verið áhugaður í tematiskum sambondum millum serliga surf/instrumental og horror/halloween. Burturúr spurdist hetta miksið við surf, rockabilly og garage klassikarum um ólátaðan óhugna, retro ræðuleikar og øtiligan ørskap! Miksið er til eitthvørt høvi, tað verið seg gaman ella álvara. 

Sum tann tónleikanørdurin Knút er, so sleppa vit ikki undan nøkrum hagtalsligum viðmerkingum: 
 

- Tey flestu løgini eru frá tíðarskeiðnum 1955-1966. 

- 1961 er best umboðaða árið við tilsamans 6 løgum.

- Býtið millum instrumentalløg og løg við sangi er 50/50.

- 11 bólkar byrja við “The” (eitt klassiskt surf/instrumental eyðkenni). Telja vit backing bólkarnar hjá teimum báðum Dick Dale og Link Wray uppí (The Del-Tones og The Ray Men) økist talið til 13.