Nýggj fløga - Heiðrikur á Jarðarferð

1. septembur verður fløgan “Funeral” eftir Heiðriki Á Heygum til taks. Vit tosa við Heiðrik um hana og fyrsta staklagið, sum er útgivið við sjónbandi. Tað sæst niðast í greinini. 

 

Listamaður uttan mørk

 

Filmsleikstjóri, sangari, tónleikari, málari… Hvat kann eg kalla teg í greinini? 

 

- Eg haldi ikki, mann eigur at pakka ymiskar greinar av list soleiðis niður í ymiskar eskjur. Listin er uttan mørk, verið tað seg tónleikur ella málarí. Eg úttrykki meg á ymiskar hættir til ymisk høvi. 

 

 

Mynd: Sigga Ella

 

Sangir um fyrrverandi tilverustríð sum samkyndur 

- Nógv er hent, síðani eg var barn. Samkynd vóru als ikki viðurkend sum nú, men heldur var homofobi dagligur kostur. Eg og onnur samkynd vuksu upp við skuldarkenslu, tí vit vildu sjálvandi ikki samanberast við nakað negativt. 

 

 

Leggur lok á fortíðina

- Keðiligu minnini frá yngri árunum kann eg ikki lættliga skúgva til viks, men í fløguni viðgeri eg tað, ið er hent. Hon eitur “Funeral”, tí at eg ikki peiki fingur eftir nøkrum, ei heldur dømi eg nakran. Friðarliga og virðiliga leggi eg lok á fortíðina, leggi blomstur á gamla grøv og fari víðari. 

 

 

Fløgan vígd ungum LGBT’arum 

- “Funeral” er vígd ungum LGBT’arum og er ætlað at geva vón og áræði til teirra, ið kenna somu trupuleikar, ið samkynd gjørdu fyri mongum árum síðani.

 

 

Dapurt evni við humoristiskari viðgerð

- Hóast evnið er sera tungt og dapurt, so eru sangirnir meira kátir. Humor er umráðandi, tá mann viðger slíkt, fyri ikki at gerast ov hugtungur. 

 

 

Natúrlig fløga 

- Øll fløgan er innspæld við “ordiligum” instrumentum. Sungið verður uttan autotune, og songkvinnurnar úr “Kata” syngja kór til nakrar sangir. Ongar elektroniskt programmeraðar effektir beinleiðis úr teldum eru nýttar, sum annars er sera vanligt í dag. Ljóðið er tískil sera organiskt. 

 

 

Leitar aftur til røturnar

- Síðani eg var smádrongur, havi eg hugt eftir gomlum, glamurøsum Hollywood filmum og lurtað eftir jazz og fólkatónleiki úr 1920 - 1950’unum. Íblástur til fløguna er serliga harfrá, og eg vildi gera fløguna, eins og mann gjørdi fyrr. Brúka tey ljóðførini, sum mann fekk hendur á. 

 

 

Mynd: Sigga Ella

 

Sjónband til øll løgini

- Tað er ambitiøst, men ætlanin er at gera video til øll løgini á fløguni.

 

 

Broytist myndin, um mann skiftir rammuna? 

- “Change the Frame” snýr seg um, hvussu dreymakend ein løta kann tykjast, tá vit møta onkrum heilt serligum eitt vakurt stað í summar og sól, og um óttan at ikki uppliva løtuna eins vakra, taka vit sama viðkomandi til køldu og gráu Føroyar. Altso - hevði myndin verið tann sama við øðrvísi rammu? Sjónbandið er í tráð við sangin. Tað er um alt, sum broytist rundan um meg, meðan eg standi í stað, óbroyttur.