Finnbogi Danielsen, kendur heilsølumaður á Tvøroyri, byrjaði hjá Poul Hansen heilsølu á Hvítanesi sum 17 ára gamal. Hóast deildin á Tvøroyri lat aftur beint eftir aldarskiftið, arbeiðir hann framvegis hjá fyritøkuni, og hann hevur nú fingið heiðursmerki, "Den kongelige belønningsmedajle", frá Margrethu drotning fyri trúgva tænastu í samfull 50 ár. Hann er boðin at hitta drotningina í apríl og tað ætlar hann sær. Finnbogi sigur, at handilslívið er ómetaliga nógv broytt hesi hálvthundrað árini. Frá nógvum smáum til nakrar fáar stórar handlar.

Jack Petersen býr í barnaheiminum á Hvítanesi á Tvøroyri, og hann er arbeiðsmaður hjá Tvøroyrar Kommunu. Hann heldur lítið um at alt skal avgreiðast í teldu nú á døgum. Sjálvur hevur hann onga teldu og hann hevur eina fartelefon, ið bara kann ringja og senda SMS-boð. Hann hevur tó visakort, og tá hann skal gjalda okkurt, tekur hann pengarnar út. Og fyri nøkrum døgum síðani giftist Jack við Valindu Manikat úr Tailandi, sum hevur arbeitt á flakavirkinum í Hvalba í trý ár. Hon hevur búð beint niðanfyri hjá Jack.

Gudrid Nolsøe, fysioterapeutur, læt í august í 2020 upp viðgerðarstovu í húsunum, sum hon og maðurin Bárður hava keypt á Hvítanesi á Tvøroyri. Gudrid Nolsøe sigur, at nógv fólk slíta í tí og vit eru ikki nóg røsk at røkja kroppin. Tí er hon fegin at hjálpa fólki við spenningum og skaðum.

Turið Vestergaard í Dali er glað fyri tað sermerkta barnaheimið uppi á høga bakkanum á Hvítanesi, sum dóttirin Marin í Dali og Uni Debes nú eiga. Marin er fjórða ættarlið í húsunum. Turið hevur nógv góð minnir her. Í hennara barnaárum vóru nógv børn á Hvítanesi og tey hildu væl saman. M.a. sluppu tey upp í part bæði niðri á heilsøluni og tá nógv sild kom upp á land á Hvítanesi.

Mortan Petersen hevur havt nógvar upplivingar og veit nógvar søgur frá træbryggjuni á Hvítanesi. Serliga minnist hann dagarnar tá skipið hjá Føroya Bjór kom við sodavatni og øli. Tá sluppu óvitarnir umborð og teir sluppu at drekka so nógv sodavant sum teir orkaðu. Og dreingirnir á Hvítanesi høvdu ein føroyskan træbát, sum teir sjálvir høvdu lagt dekk í og sigldu við á fjørðinum. Í óveðri sleit hann og rak til havs.

Umstøðurnar hjá Froðbiar Sóknar Róðrarfelag hava verið ógviliga trongar, og tí hevur felagið júst planerað og stoypt sokkulin til stórt neyst á Hvítanesi. Uni Jacobsen, formaður í FSF, sigur, at tað verður samstundis ein sjódepil, har pláss verður fyri alskyns virksemi á fjørðinum. Felagið hevur fingið 3,8 milliónir krónur frá danska LOA-grunninum, Lokale & Anlægsfond, og harafturat er Tvøroyrar Kommuna eisini við í verkætlanini, sum tilsamans kostar 10 milliónir krónur.