Við Tórði á túri

Við Tórði á túri Millum Gilja í Hoyvík
27-11-2023
Býlingurin Millum Gilja var slóðbrótandi tá útstykkingin varð gjørd seinnapartin í áttatiárunum. Har eru bæði randarhús og vanlig sethús og nú búgva umleið 600 fólk har

Býlingurin Millum Gilja í Hoyvík, sum varð útstykkjaður seinnapartin í áttatiárunum, var fyrsti býlingur við bæði randarhúsum og sethúsum. Her eru 75 støk sethús og 56 randarhús, har fólk yvirtóku brandveggir og rond og sjálvi kundu byggja og innrætta seg. Í dag búgva umleið 600 fólk Millum Gilja.

-Kombinatiónin millum randarhús og støk sethús er sera góð og húsini líva væl fyri hvørjum øðrum. Hetta er væl hugsað, sigur Kristian Martin Joensen, formaður í Eigarafelagnum Millum Gilja.

Hallgerð Gregersen Olsen og Helgi Dam Ziska høvdu hugt eftir nógvum húsum í Havn í tvey ár, men tá tey fyrstu ferð fóru út miðbýnum í Havn niðan Millum Gilja at hyggja eftir einum randarhúsum, ivaðust tey ikki eina løtu. Tey vórðu beinanvegin samd um, at hetta vóru húsini. Síðani tey fluttu í býlingin eru fleiri ungfólk í teirra aldri komin higar og fleiri børn eru nú eisini í býlinginum.

Sonurin Leivur er hálvt ár og Hallgerð hevur barnsburðarfarloyvi enn. Umframt sítt borgarliga starv er Helgi, sum er okkara fyrsti og einasti stórmeistari í talvi, ein dag um vikuna á Námi og fer út í skúlarnar kring landið at undirvísa í talvi. Hann sigur, at áhugin fyri talvi millum børn og ung er nógv vaksin.

Tá tú kemur inn í sethúsini Millum Gilja 48 er tað nærum sum at koma inn í eitt listasavn. Tá húsini vórðu bygd, hugsaði Sjúrður Horsdal um listina hjá pápanum, Poul Horsdal, sum var viðurkendur listamaður. Sjúrður vildi hava nógv veggjapláss og høgt til loftið, tí nógv listaverk hjá pápanum eru stór. Listin hjá Poul Horsdal er ljós og kortini litrík.

Konan í húsinum, Sigirð Højsted, er uppvaksin longur niðri í Hoyvík, men trívist væl her uppi í Hoyvíkshaganum. M.a. er hon sera glað fyri tær nógvu og væl útbygdu gongugøturnar rundan um býlingin og í Hoyvík sum heild.

Elisabeth Rasmussen hevur uppalt nógv børn Millum Gilja, tí hon hevur arbeitt í Býlingshúsinum her 15 ár. Tilsamans hevur hon arbeitt hjá barnaansingini í Tórshavnar Kommunu í meira enn 40 ár. "Framvegis fari eg hvønn dag spent til arbeiðis, tí uppgávurnar eru ymiskar og børnini eru ymisk", sigur Elisabeth, sum sjálv býr í randarhúsum Millum Gilja.

Bárður Niclasen er hoyvíkingur við stóra H. Hann sigur, at hann er ein av teimum fáu hoyvíkingunum, sum ikki hava spælt hondbólt. Hann sigur, at Ferðslan er nógv vaksin og t.d. klokkan átta um morgunin er torført at koma út á Vegin langa.

-Nýggi ringvegurin, sum verður gjørdur omanfyri hjá okkum, fer at gagna býlinginum, tí vit verða bundin í ringvegin, sigur Bárður Niclasen..  

Fleiri av teimum, ið eru uppvaksin Millum Gilja, hava keypt hús og eru flutt aftur í býlingin. Eitt av teimum er Ann Tordis Kelduberg Hellisdal. Hon og maðurin Helgi Pauli keyptu húsini Millum Gilja 18 frá foreldrunum hjá einari vinkonu hjá Ann Tordis, so her hevur hon havt nógvar góðar løtur í uppvøkstrinum. Men tey hava gjørt nógv við húsini síðani tey keyptu tey. Ann Tordis helt at ov lítið samband var millum fólkið í býlinginum, og tí gjørdi hon ein Facebook-bólk fyri øll.

Tey, sum eru við í sendingini, eru: Kristian Martin Joensen, Hallgerð Gregersen Olsen, Helgi Dam Ziska, Sjúrður Horsdal, Sigrið Højsted, Elisabeth Rasmussen, Bárður Niclasen og Ann Tordis Kelduberg Hellisdal

Við Tórði á túri

Í sendingini "Við Tórði á túri", sum verður send í Útvarpinum mánadag klokkan 17:05, vitjar Tórður Mikkelsen við mikrofonini bygdir og býir kring landið og varpar ljós á gerandisdagin hjá fólki. Forvitnið er drívmegin og evni, ið ikki skapa yvirskriftir í miðlunum, hava mangan stóran týdning fyri fólkið á staðnum. Tað eru nógvar smærri bygdir kring landið, sum sjáldan fáa pláss í miðlunum, men sum avgjørt hava sína søgu. Og hvørt menniskja hevur eina søgu at fortelja. Tað hoyra vit í reportasjunum í Útvarpinum mánadag klokkan 17:05. Fyri at skapa eina variatión í sendingunum, vitjar Tórður Mikkelsen viðhvørt býlingar og ávísar gøtur. Hann hevur eisini lýst serlig tiltøk, m.o. Bindifestivalin og Sjómannadagin, og onkuntíð er hann á túri í øðrum londum.
Fransiskanarsystrarnar í Havn hava verið greiðar yvir, at einferð kom dagurin at tær máttu fara úr Føroyum. Og nú er dagurin nær, tí í juni komandi ár fara tær avstað
04-12-2023
Býlingurin Millum Gilja var slóðbrótandi tá útstykkingin varð gjørd seinnapartin í áttatiárunum. Har eru bæði randarhús og vanlig sethús og nú búgva umleið 600 fólk har
27-11-2023
Hvannhagi er eitt vakurt og sermerkt náttúruøki í norðaru helvt av Suðuroynni. Menn úr Nepal hava nú laðað eina vakra gróttrappu, eina sherpatrappu, niður í Hvannhaga
20-11-2023
Tey, sum ganga við Gongufelagnum í Havn, uppliva allar Føroyar. Í samfull 30 ár hava 40 gongutúrar verið um árið og eingin túrur er avlýstur
13-11-2023
Í Aalborg eru nógvir føroyingar, og í hesum seinna partinum hoyra vit m.a. umboð fyri Føroyingafelagið Álaborg greiða frá virkseminum hjá føroyingum í býnum
06-11-2023
Aalborg er ein nógv broyttur býur, frá at vera ein gráur ídnaðarbýur er hann blivin ein mentanarbýur við nógvum lesandi ungfólkum. Vit hoyra at føroyingar trívast væl í býnum
30-10-2023
10. Heystfagnaðurin hevur júst verið á Eiði og hetta tiltakið er komið fyri at vera, og fólk á Eiði eru glað fyri av skipa fyri bygdasligasta tiltakinum í landinum
23-10-2023
Akrar varð bygd fyri góðum 200 árum síðani. Hon er niðursetubygd frá Sumba. Her hava búð meira enn 60 fólk og nú eru tey 12 sum búgva fast í bygdini
16-10-2023
Uppsalar er ein av teimum fýra elstu býlingunum í Klaksvík og var tann størsti. Hann hevur røtur heilt aftur í víkingatíð
09-10-2023
Gomlu starvsfelagarnir Asfinn Sigvardsen og Jens Dalsgaard settu sær fyri trimum árum síðani fyri at ganga til øll vøtn í Føroyum. Í dag eru vit við teimum til seinasta vatnið
02-10-2023
Eitt vikuskifti í summar samlaðust skyldfólk úr Egholmsættini í Føroyum á oynni Egholm í Limfjørðinum við Aalborg, haðani navnið á hesum eftirnavninum kemur.
25-09-2023
12 ára gomul fór Henny Egholm til Havnar at ganga í millum- og realskúla, og har búði hon undir sera trongum korum saman við mammuni ymsa staðni í býnum
26-06-2023