Nógvir føroyingar hava verið í býnum Nakuru og hjálpt til hjá felagsskapinum New Life Afrika International, sum donsku hjúnini Susanne og Leif Madsen reka. NLAI er ein sjálvboðin felagsskapur, sum gevur fátækum børnum og ungum møguleika at ganga í skúla og útbúgva seg til framtíðina, og harafturat lærir kreppuraktar kvinnur at seyma. 

Beint nú er ein føroyingur her. Tað er Jóna Hansen, sum er í Nakuru fyri 11. ferð og hjálpir til. Saman við Susanne Madsen vísir Jóna okkum stóra ruskplássið í býnum, har nógvar familjur búgva. Tað er ein syndarlig sjón. Men sólskinssøgan í hesum er forskúlin fyri børnini, sum vaksa upp á ruskplássinum og økinum beint uttanum.

-Fyri meg gevur tað nakað serligt at koma til Nakuru at hjálpa til. Nú er tað sum at koma heim, hvørja ferð eg komi til Kenja og eg elski bæði fólkið og landið, sigur Jóna. Susanne og Leif Madsen hava ábyrgdina av tilsamans 800 næmingum.

Maria Syderbø Mikkelsen, sum lesir til sosialráðgeva og er í starvslæru hjá ABC Childrens Aid Kenya og íslendsku Þórunn Helgadóttir, er hugtikin av ungu Abby úr USA. Fyri fýra árum síðani kom Abby, sum tá var 14 ára gomul, til Kenja at vitja saman við øðrum úr USA. Síðani hevur hon stovnað ein sjálvbodnan felagsskap í USA, sum hevur fingið fólk har at stuðla skúlagongdini hjá nógvum børnum á skúlunum hjá Þórunn í Nairobi og Loitoktok. Nú ætlar Maria eisini at útvega fleiri stuðulsfamiljur í Føroyum.

Betsy Gichuki er úr Kenja og hon hevur búð í Føroyum í 10 ár. Hon sigur, at hon roynir at læra børnini at hava virðing fyri familjuni og serliga at virða tey eldru fólkini, sum hava stórar lívsroyndir. Tað er ein partur av mentanini í Kenja.

Flestu útlendsku ferðafólkini, ið koma til Kenja at vitja, fara eisini á safari at uppliva tey serligu djórini, sum tú vanliga bara sært í einum djóragarði. Her eru tey í sínum náttúrliga umhvørvi. Vit síggja m.a. krokudillur, áarross, leyvur, fílar, giraffar og mangt annað.

Í einum fátækrabýlingi í Nairobi vitja vit Grace. Hon er ein av kvinnunum, sum eru við í einari skipan hjá Føroysku Barnahjálpini, at hjálpa fátækum konum at skapa sær egna vinnu. Serliga ein kona í Føroyum, Beinta undir Skarði á Sandi, hevur latið pengar til hesa skipan. Grace koyrir í bussi til Uganda at keypa klædnatilfar og kemur aftur til Nairobi at selja. Hetta hevur gjørt, at nú kára hon og familjan seg fíggjarliga.

Hilda Viderø frá Føroysku Barnahjálpini sigur, at henda verkætlan hevur spreitt seg sum ringar í vatninum, tí fyribils eru átta konur við í hesi skipan. "Vit tryggja okkum at tað eru tær røttu konurnar, ið koma í hesa skipan og at børnini eisini fáa ágóðan," sigur Hilda.