Álopsmaður drap løgreglumann á høvuðsgøtu í Paris

21.04.2017 - 10:50
AktueltÚtheimurin
Álopsmaður drap løgreglumann á høvuðsgøtu í Paris
Víðfevnd trygdartiltøk eru sett í verk, so forsetavalið ikki verður órógvað, sigur franski forsætisráðharrin.
Mynd: © Savnsmynd  
 
 

Løgreglan í Paris hevur eyðmerkt mannin, sum leyp á ein løgreglubil á høvuðsgøtuni Champs Elysees í gjárkvøldið. Ein løgreglumaður doyði, tveir vórðu løstaðir av skotunum og álopsmaðurin sjálvur doyði, tá løgreglan svaraði aftur.

Myndugleikarnir vilja ikki nevna mannin við navni, men siga, at hann er 39 ára gamal, búði í útjaðaranum í Paris og var undir illgruna fyri at hava víðgongd islamisk sjónarmið.

Franskir fjølmiðlar siga, at álopsmaðurin fyri nøkrum árum síðani sat langan fongsulsdóm fyri at hava latið skot av ímóti løgregluni.

Okkara maður, siga islamistarnir

Islamiski staturin sigur, at tað var teirra maður, sum framdi álopið.

Reuters tíðindastovan sigur, at franska løgeglan hevur tikið trý skyldfólk hjá álopsmanninum til avhoyringar. Haraftrat hevur ein maður, ið er undir illgruna fyri at hava samband við álopið, sjálvboðin vent sær til løgregluna í Belgia.

Forsetaval verður í Fraklandi sunnudagin, og Bernard Cazeneuve, forsætisráðharri, sigur, at øll trygdartiltøk verða sett í verk fyri at tryggja, at hetta fyrravalumfarið ikki verður órógvað.

Dagurin í dag var tann seinasti í valstríðnum, men eftir álopið í Paris siga trý av fýra høvuðsvalevnum, Emmanuel Macron, Francois Fillon and Marine Le Pen, at tey ikki hava hug at halda fleiri valfundir.

 

Nýggjastu sendingar í ÚV
Nýggjastu sendingar í SV
Mánadag 24. apríl
Andaktin
Sunnudag 23. apríl
Møti úr Lívdini í Hoyvík
Leygardag 22. apríl
Stóri FM-dagurin
Leygardag 22. apríl
Skam, røð 4. 2. partur
Fríggjadag 21. apríl
Í Drátti