- Tíðindi, mentan og ítróttur
TAKS hevur enn ikki skilt Skattamálið
Eyðun Mørkøre, stjóri á TAKS, segði í Degi & Viku týskvøldið, at upplýsingarnir, sum TAKS fekk aftaná, at Fíggjarligt Støðufesti varskógvaðu føroyskar myndugleikar um málið, vóru óviðkomandi fyri málið.
Hetta hevur Jørn Astrup Hansen - fyrrverandi stjóri og nevndarlimur í Eik Banka - ilt við at skilja.
Tí í endaligu avgerðini hjá TAKS í málinum verður víst júst til upplýsingar, sum TAKS fekk í 2016.
- Seks ferðir - eg endurtaki, SEKS ferðir - vísir TAKS í síni endaligu niðurstøðu til upprit frá grannskoðarunum og Fíggjarligum Støðufesti. TAKS kendi ikki nakað av hesum uppritunum, tá TAKS í juni 2015 játtaði Eik Banka at viðgera yvirtikna hallið sum skattligt goodwill, sigur Jørn Astrup Hansen.
- Vóru hesi uppritini óviðkomandi, soleiðis sum Eyðun Mørkøre (stjóri á TAKS) sigur, hví vísir TAKS á uppritini í síni niðurstøðu, spyr Jørn Astrup Hansen.
Sambært Jørn Astrup Hansen er einki skil í frásagnini hjá TAKS um, at Eik Banki hevði rætt til skattafrádrátt fyri goodwill, men at virði á hesum frádrátti var 0 krónur.
Tað er bert ein staðfesting av, at TAKS enn ikki skilur málið, vil fyrrverandi bankastjórin vera við.
- At tosa um goodwill fyri 0 krónur er beinleiðis møsn, sigur Jørn Astrup Hansen.