- Tíðindi, mentan og ítróttur
Johnson avdúkar skjótt Brexit-ætlan
Tað siga ónevndar keldur fyri BBC og The Telegraph. Eftir øllum at døma ber ætlanin í sær, at eingin tollmúrur verður á markinum millum Írland og Norðurírland.
The Telegraph skrivar, at Boris Johnson ætlar at skipa eitt búskaparligt øki í Írlandi. Tað skal tryggja, at matvørur og landbúnaðarvørur sleppa ótarnaðar um markið.
Tollmiðstøðir báðumegin markið
Írska sjónvarpsstøðin, RTE, skrivar, at ætlanin er at hava tollmiðstøðir, sum tær verða nevndar, báðumegin markið. Men írski uttanríkisráðharrin, Simon Coveny, hevur longu víst hesi ætlanini aftur.
– Hetta er ein deyðfødd ætlan, skrivar uttanríkisráðharrin á Twitter. Tíðin er komin, at ES fær eitt uppskot frá Bretlandi, sum álvari er í, skal Brexit verða veruleiki seinast í oktober. Norðurírland og Írland hava betri uppiborið, sigur írski uttanríkisráðharrin.
ES hevur leingi eftirlýst ítøkilig uppskot úr Bretlandi í spurninginum um markið millum Norðurírland, sum fer úr ES saman við Bretlandi, og Írland, sum verður verandi í ES. Bretland skal eftir ætlan fara úr ES 31. oktober.