- Tíðindi, mentan og ítróttur
Betri umstøður at flyta millum Føroyar og Danmark
<p>Annika Olsen, landsstýriskvinna í almannamálum, og danski almannamálaráðharrin, Karen Hækkerup, eru samdar um at styrkja samstarvið á almannaøkinum millum Føroyar og Danmark.</p><p>Annika Olsen hitti Karen Hækkerup í Keypmannahavn mánadagin.</p><p>Semja er um at víðka fráboðanarskylduna, tá familjur
við børnum við serligum avbjóðingum flyta millum Føroyar og
Danmark, so eisini donsku kommunurnar fáa heimild at senda víðari
málsupplýsingar millum danskar og føroyskar myndugleikar.</p><p><b>Noydd at fara til Danmarkar</b></p>
<p>- Tað vil altíð verða okkara mál at bjóða øllum okkara børnum og ungum tilboð her
heima, men enn eru vit av og á noydd at leita til Danmarkar
eftir besta tilboðnum. Í teimum førum er tað av avgerandi
týdningi, at bæði føroyskir myndugleikar og familjurnar sjálvar kunnu kenna seg tryggar við at at senda børn og ung á stovn í
Danmark. Tí er styrkta samstarvið týdningarmikið og at fegnast
um, sigur Annika Olsen.</p>
<p>Danski almannamálaráðharrin, Karen Hækkerup, sigur:</p>
<p>- Tað er avgerandi, at vit syrgja
fyri, at børn við sosialum trupulleikum fáa ta hjálp, sum tey
hava brúk fyri, sama um tey búgva í Danmark ella í
Føroyum. Og hjálpin má ikki seinkast, tí flutt verður innan
ríkisfelagsskapin. Tí eri eg fegin um, at landsstýriskvinnan í
almannamálum og eg eru samdar um at styrkja samstarvið á hesum
øki.</p><p><b>Kommunurnar kunnast betur</b></p>
<p>Annika Olsen og Karen
Hækkerup eru isini samdar um, at kommunurnar skulu kunnast betur um samstarvið
á almannaøkinum í ríkisfelagsskapinum. Fyri at lætta um
málsgongdina og gera viðurskiftini greiðari á hesum øki, verður
tí millum annað sett í verk eitt vegleiðingarátak, so donsku og
føroysku kommunurnar ikki eru í iva um hvat er galdandi, tá
familjur flyta millum londini.</p>
<p>Arbeiðið verður væntandi liðugt í
heyst.</p>
<p><br></p>
