Varðin-útbyggingin á býráðsfund fyrrapartin

Býráðið á Tvøroyri fer á eykabýráðsfundi klokkan tíggju fyrrapartin at brúka lógarheimildina, sum býráðið fekk í gjár, at stytta freistirnar, nú byggisamtyktin skal broytast.

Á skránni fyri eykabýráðsfundin er byggisamtyktin á havnarøkinum, broytingaruppskot og framskundað mannagongd.

Síðani skal skrivast ein umsókn til Innlendismálaráðið um undantaksloyvi eftir broyttu lógini og eitt kunningarskriv til fólkið í kommununi. 

Skal grundgeva fyri at kunna brúka lógarbroytingina, noyðist Tvøroyrar kommuna við loyvi frá Innlendismálaráðnum at leggja fram aftur broytingarnar í byggisamtyktini, sum annars lógu frammi til í gjár við kærufreist til 9. apríl.

Saman við umsóknini skal býráðið grundgeva fyri, hvørji týðandi samfelagslig og vinnulig atlit tala fyri, at Tvøroyrar kommuna skal hava frávik frá vanligu freistunum.

Eingin ivi er um, at Tvøroyrar kommuna fær loyvið frá landsstýrismanninum. Tað var jú tí, at lógin varð broytt.

Og so skal býráðið í seinasta lagi dagin eftir, at tað fær loyvið um frávik frá tíðarfreistunum, beinleiðis og persónligt kunna tey fólk, sum broytingin ávirkar.