Íslendingar harmast ES-tiløk móti Føroyum

-Vit eru vónbrotin at síggja, at ES velur at seta í verk revsitiltøk móti Føroyum fyri silda- og makrelveiðina. Vit meta ikki, at hetta er besti hátturin at loysa hetta slagið av ósemjum millum lond, sum annars sita væl um sátt. Hetta átakið úr Brússel máar støðið undan royndunum hjá strandalondunum at finna eina loysn við diplomati og samrøðum, sigur fiskimálaráðharrin, Sigurdur Ingi Jóhannsson, sambært Fishupdate.com.

Ráðharrin sigur seg hava álit á, at tað ber til at finna eina loysn á makreltrætuni, sum er rættvís fyri øll strandalondini og sum er grundað á vísundina. Men fyri at hetta skal henda, noyðast ES og Norra at viðurkenna, at makrelurin hevur broytt ferðingarmynstur og í stórum tali er í íslendskum sjógvi seinastu árini.

-Kvotur eiga at verða ásettar eftir veruleikanum í 2013, og ikki eftir ferðingarmynstrinum, sum makrelurin hevði fyri tíggju árum síðan, sigur íslendski fiskimálaráðharrin.

Ísland hevur - eins og Føroyar - ásett sær størri makrelkvotu enn ES og Norra meta vera rætt, og ES fyrireikar í løtuni revsitiltøk móti Íslandi.

Hinvegin er Ísland við í semjuni hjá strandalondunum um sildakvotuna í ár. Har avgjørdu Føroyar at áseta sína egnu kvotu, sum er góðar tríggjar ferðir størri enn tað, sum hini londini hildu vera hóskandi.