Granskarar og leikfólk í vísindasiðsemisnevndina

Lógin um vísindasiðsemiliga viðgerð av heilsuvísindaligari gransking er nú dagførd í Føroyum, so vit hava somu lógina, sum kom í Danmark fyri tveimum árum síðani

Granskarar og leikfólk skulu í vísindasiðsemisnevndina sambært dagførdu lógini.

Høgni Djurhuus

Grækaris Djurhuus Magnussen

15.08.2013 - 09:44

Landsstýrið bað stjórnina seta lógina í gildi í Føroyum eisini, og í mai í ár samtykti løgtingið lógina, sum kemur í staðin fyri lógina frá 1999.

Lógin, sum er galdandi í Føroyum, er lagað til føroysk viðurskifti, har tey ikki eru tey somu sum í Danmark.

Meta um – og geva loyvi
Sambært lógini skal ein vísindasiðsemisnevnd meta um og geva loyvi til gransking á heilsuøkinum.

Nevndin, sum nú er, heldur fram til landsstýrismaðurin í heilsumálum hevur valt nýggja nevnd. Arbeiðið at velja nýggja nevnd er byrjað, upplýsir Heilsumálaráðið.

Í nýggju lógini eru ikki somu ásetingar sum í gomlu lógini um, hvussu nevndin skal mannast.

Í nevndini skulu vera granskarar og leikfólk.

Í verandi Vísindasiðsemisnevnd eru tveir yvirlæknar, tveir studentaskúlalærarar, ein prestur, ein sjúkrarøktarfrøðingur og ein kommunulækni. Gunhild Ísfeldt, lækni, er forkvinna í nevndini.