Rúsan megnaði avlopskravið í fjør

Politiska avlopskravið hevur óhepna ávirkan á tænastustøðið og trivnaðin hjá starvsfólkunum hjá Rúsdrekkasølu landins.

Kravið hjá løgtinginum um næstan 17 milliónir krónur í avlopi, sama hvussu nógv verður selt, er ein tungur kleppur at dragast við hjá Rúsuni.

Tað verður endurtikið í ársfrágreiðingini fyri 2012.

Kravið hækkaði 50 prosent

Avlopskravið hækkaði nógv, 50 prosent, í 2010. Tað gjørdi, at prísirnir hækkaðu, førleikamenningin hjá starvsfólkunum varð avmarkað og nógv minni er brúkt til íløgur og viðlíkahald.

Avlopið hjá Rúsdrekkasøluni í fjør var góðar 16,8 mió. kr., góðar 1.000 kr. meira enn løgtingið kravdi.

Í fjør mælti leiðslan hjá Rúsdrekkasøluni til at gera Rúsdrekkasøluna til alment partafelag. Ella seta kravið um avlop eftir søluni.

Vinningsbýti

Verður Rúsdrekkasølan alment partafelag, fær landskassin vinningsbýti av vinninginum, vóru ráðini í fjør.

Hin møguleikin er at seta avlopskravið eftir umsetninginum ella sum serligt avgjald eins og onnur avgjøld á rúsdrekka. Rúsan seldi meira í fjør enn árið fyri. Sølan í fjør var 120,1 millión, hon var 117,7 mió. kr. í 2011.

Ølið, sum føroysku bryggjaríini sjálvi selja, er ikki við í tølunum hjá Rúsuni.