TAKS kannar um vinnubilar verða nýttir privat

11 feløg hava fingið bræv frá TAKS, har tey verða biðin um greiða frá, um bilarnir hjá felagnum burtur av verða nýttir til vinnuligt virksemi.

Í sambandi við tveir landskappingardystir í fótbólti fyri einari viku síðan, kundi eftirlitið hjá TAKS staðfesta, at fleiri bilar, ið einans skulu nýtast til vinnuligt virksemi, vóru parkeraðir á økinum kring vøllirnar, meðan dysturin varð spældur.

Frí nýtsla

Sambært lønaryvirlitinum hjá feløgunum er talan um bilar, ið ikki rinda skatt av fríari nýtslu.

Eftirlitið hjá TAKS hevur seinastu tíðina kannað bilar í sambandi við ymisk almenn tiltøk.

Fótbóltsdystirnir í Klaksvík og Gøtu vóru enn eitt eftirlitsátak, og hesi 11 feløgini hava nú fingið bræv, har tey verða biðin at greiða nærri frá, hví bilarnir vóru til dystirnar.

Hava ikki rætt at draga frá

Feløg hava ikki rætt til at draga íløgu-MVG frá, verður akfarið burturav ikki nýtt til MVG-skyldugt virksemi. Í sama viðfangi er tað eisini skattskyldugt hjá privatpersónum at nýta vinnuligar bilar til privata nýtslu.

Tað áleggur øllum feløgum at upplýsa, um starvsfólk hava rætt til at nýta akfør til privat ørindi og harvið skatta av fríari nýtslu, sigur TAKS.