Línuskipini fingið væl burturúr á Flemish Cap

Hóast tað er langt at sigla til Nýfunnalands á ísfiskaveiðu, er líkt til, at føroysku línuskipini hava fingið væl burturúr, og at fiskiskapurin á Flemish Cap hevur verið eitt gott ískoyti hjá línuflotanum. Átta skip hava verið í Nýfunnalandi, og øll hava gjørt góðar túrar.

Kambur, sum var fyrsta skipið ið fór avstað, kom aftur í gjárkvøldið av fjórða túrinum, og aftur hesaferð fingu teir uppí. Váðasteinur, sum eisini hevur roynt á Flemish Cap er á veg heim av fjórða túrinum, og eisini teir hava fingið uppí.

Fara til Íslands

Hini skipini hava verið færri túrar. Tey flestu skipini hava kvotu í íslendskum sjógvi, og fara tí ikki aftur til Nýfunnalands í ár, hóast eitt sindur er eftir av kvotuni, sum var sløk 3.200 tons.

Kambur hevur avreitt fyri umleið 6 miljónir kr., ella hálva aðru miljón kr. fyri hvønn túrin. Men teir hava nýtt einar 14 vikur til teir fýra túrarnar.

- Tað er ov langt at sigla til Nýfunnalands á feskfiskeviðu. Tað einasta, sum bjargaði tí fiskiskapinum, var tann nógvi fiskiskapurin, so tað gekk skjótt at fáa uppí. Var talan um vanligan, ella vánaligan fiskiskap, so hevði úrslitið ikki verið so frægt, sum tað gjørdist, eru menn samdir um.

Enn langt á mál

Seinastu árini hava línuskipini ikki fingið stórvegis burturúr, tí fiskiskapurin hevur verið so vánaligur. Og hóast góðan fiskiskap í Nýfunnalandi, so er langt á mál, áðrenn línuskipini kunnu rekast á so frægum grundarlag, at menn kunnu skiftast um at vera umborð og at vera í landi. Til tað resta fleiri miljónir kr. í hjá línuskipunum, siga teir, sum manna skipini.