Apoteksverkið fíggjar sjúkraviðgerð uttanlands

Vinngurin hjá Apoteksverkinum skal brúkast til at senda sjúklingar av landinum til viðgerðar. Landsstýrismaðurin í heilsumálum hevur biðið um 7,5 mió. kr. afturat til sjúklingaviðgerðir uttanlands í ár. Uppskotið um eykajáttan kom í løgtingið í gjár.

Eykajáttanin er útreiðslunoytral. Pengarnir koma frá Apoteksverkinum, sum skal selja fyri 7,5 mió. kr. meira í ár. Inntøkurnar hjá Apoteksverkinum í fíggjarlógini eru hækkaðar upp í 227,5 mió. kr.

Ongar avmarkingar

Karsten Hansen gjørdi longu í mars landsstýrið varugt við, at ov fáir pengar vóru til viðgerðir uttanlands í ár. Hann boðaði samstundis frá, at hann ætlaði at seta avmarkingar í gildi fyri at halda játtanina. Men tað vildi landsstýrið ikki. Játtanin til serviðgerð uttanlands er 138 mió. kr. Og nú er løgtingið biðið um at lata 7,5 milliónir afturat.