Franski forsetin hevur í fleiri umførum sett spurnartekin við amerikanska áhugan fyri NATO.
"Nato er heiladeytt", segði Macron í bretska tíðarritinum The Economist ein mánað áðrenn Nato skuldi hátíðarhalda sín 70 ára føðingardag í december í fjørð og sipaði til, at tað sokallaða musketerlyfti reelt ikki er galdandi longur.

Evropa má ganga egnar leiðir heldur Macron - bæði tá tað kemur til trygdarpolitikk, men eisini tá tað kemur til veðurlagspolitikk og fíggjarpolitikk, má Evropa tosa um eina felags ætlan.

Vesturlendsku virðini eru ikki longur neyðturviliga tey somu, og populistiska rákið er við at kippa versturlendska projektið við humanismu og fólkaræði í miðdeplinum segði Macron á árligu trygdarráðstevnuni í Munchen 15 februar í ár.

- Fyri 15 árum síðani hildu vit at vesturlendsku virðini vóru universel og at tey fóru at vera galdandi um allan heim - men soleiðis er tað ikki í dag - nýggj virðir seta dagsordanina í versturheiminum, og Evropa má ganga egnar leiðir, segði Macron millum annað í samrøðu á trygdarráðstevnuni í Munchen
Macron hevur fleiri ferðir rykt millum annað Týskland eftir eini avgerð um eina felags evropeiska strategi, og evnið at taka eina avgerð rættstundis kann vera altavgerandi fyri framtíðini hjá Evropa segði hann í Munchen tann 15. februar.

- Tað er nú ein avgerð má takast, so Evropa kann gerast meiri sjálvstøðugt og óheft av USA, segði franski forsetin.
Vandi er fyri at kreppan í Nato kann taka ES við sær í fallinum, heldur danski rithøvundurin Peter Wivel. Peter Wivel hevur verið blaðstjóri á Weekendavisen, Berlingske og Informatión og býr í dag í Berlin har hann skrivar av og á fyri danska tíðindablaðið Politiken.

Sambært honum er trupulleikin, at Evropa í dag ikki er ført fyri at verja ES limalond móti eitt nú Ruslandi.
Men tað er ikki bara sum at siga tað at gera eina evropeiska verju, tí Týskland kann ikki hava kjarnorkuvápn.
Hoyr samrøðuna við Peter Wivel her.