Í øðrum Norðurlondum fáa allar kvinnur tilboð um screening, sum millum annað kann staðfesta Downs Syndrom - og síðani tilboð um eina fosturtøku, um barnið hevur Downs Syndrom.
Tað verða alsamt færri børn fødd við Downs Syndromi í grannalondunum, men í Føroyum verður enn í miðal eitt barn við Downs syndromi føtt um árið, eins og fyri 10 árum síðani.
Í Føroyum hava vit ikki fría fosturtøku, men um kanning vísir at barnið eitt nú hevur Downs syndrom kann kvinnan velja at fáa fosturtøku.
Men er tað etiskt rætt? og er tað óetiskt at taka eitt fostur tí tað hevur Downs Syndrom?
Vit tosa við Dianu Reynstind serlækna í kvinnusjúkum og Katrin Kallsberg, serlækna og Jógvan D Hansen lektara í heimspeki - tey bæði eru limir í Etiska Ráðnum.

Lobbyisma og tilfeingjsgjøld
Í Noregi eru eingi gjøld á ali- og fiskivinnuni enn, tí lobbyisman er ov sterk.
Tað søgdu norsku professararnir, sum vóru á ráðstevnu um tilfeingisgjøld í Løkshøll tann 17. mars.
Hetta verður tó broytt viðvíkjandi alivinnuni í næstum, tá Stórtingið skal taka støðu til eitt tilmæli um tilfeingisgjøld á laksaaling.
Vinnan hevur skotið seg sjálvand í fótin við at royna at steðga tilgongdini. Vil man hava tryggar karmar er best at samstarva við myndugleikunum, sigur Karen Helene Ulltveit-Moe professari í búskaparfrøði og forkvinna fyri nýskipanarnevndini, sum hevur gjørt tilmæli um tilfeingisgjøld á alivinnuna í Noreg.