Góðan morgun Føroyar

Desember mánaður nærkast, og tað munnu vera fleiri foreldur, sum hugsa, hvat skal vera í teimum 24 pakkunum í jólakalendarunum til børnini.

Samstundis liggja leikur, sum als ikki verða brúktar longur, í nógvum heimum kring landið. Men hví ikki brúka júst hesar leikurnar til ein jóakalendara?

Hetta eru tankarnir, sum liggja aftan fyri endurnýtslujólakalendaran, sum Katrin Hofgaard Sørensen hevur tikið stig til.

Um vikuskiftið gjørdi hon eina síðu á Facebook, har foreldur kunnu lata og fáa jólakalendarar.

- At keypa 24 kalendaragávur kann skjótt blíva dýrt, og tá nógv fólk samstundis hava leikur liggjandi, sum ikki verða brúktar, so hugsaði eg, hví ikki lata tær leikurnar til ein jólakalendara, soleiðis at leikurnar verða endurnýttar og kunnu gleða okkurt annað barn, sigur Katrin Hofgaard Sørensen.

Í morgunsendingini greiðir Katrin Hofgaard Sørensen frá hugskotinum.