Firouz Gaini, professari í antropologi, stendur fyri verkætlanini um pápar og familjulív. Hetta er fyrstu ferð, at granskað verður í familjulívi og maskuliniteti í Føroyum.

Motivatiónin at fara undir at kanna hesi viðurskifti nærri var, at sjónarmið og royndir hjá føroyskum monnum um eitt nú kyn, barnauppaling og familjuvirði fylla ov lítið í almenna orðaskiftinum.

Fyribils úrslit benda á, at maðurin í stóran mun roynir at finna sítt nýggja pláss í samfelagnum.

Hann skal bæði røkja tann siðbundna leiklutin sum veiðumaður, men skal eisini duga tað, ið krevst av nýmótans manninum í gerandisdegnum. Nógvir uppliva, at hetta er trupult.