Í Fairfax County í Virginina í USA er í løtuni eitt ógvuliga nógv umrøtt rættarmál. Tað er sjónleikarin, Johnny Depp, sum hevur stevnt fyrrverandi konu sína, Amber Heard, ið eisini er sjónleikari, fyri ærumeiðing.

Teirra kynsliga samband byrjaði í 2012. Frá 2015 til 2017 vóru Johnny Depp og Amber Heard hjún..

Kjarnin í málinum er ein klumma í Washington Post í 2018, sum Amber Heard skrivaði.

Har nevndi Heard, at hon regluliga hevði verið fyri kynsligum harðskapi í heiminum.

Hóast Johnny Depp ikki beinleiðis bleiv nevndur við navni í klummuni, var hann ikki í iva um, hvønn klumman snúði seg um.

Hann valdi at stevna fyrrverandi konu sína eftir 50 milliónum dollarum fyri ærumeiðing.

Johnny Depp segði, at klumman hevði havt ógvuliga negativ árin á bæði hansara umdømi og hansara sjónleikarayrki.

Eftir greinina føldi hann seg sum persona non grata í Hollywood, og boð vóru ikki longur eftir honum.

Rættarmálið byrjaði 11. apríl. Johnny Depp hevur verið í vitnabásinum, fleiri vitni hava verið avhoyrd, og Amber Heard er nú eisini farin undir sína frágreiðing.

Amber Heard sigur seg regluliga hava verið fyri harðskapi av einum manni, sum av stórari rúsevnamisnýtslu hevur verið í sálarligari ójavnvág.

Johnny Depp sigur hinvegin, at tað er hann, sum hevur upplivað harðskap í hjúnabandinum.

Eitt nú misti hann petti av longutong, einaferð Heard grýtti eina vodkafløsku, sum fór í sor, tá hon rakti hondina á Depp.

Amber Heard hevur boðað frá, at tá hetta málið er liðugt, fer hon at stevna Johnny Depp eftir 100 milliónum dollarum fyri at hava framt sálarligan, kropsligan og kynsligan harðskap.