- Tíðindi, mentan og ítróttur
Góðan morgun Føroyar
Nú fyrsta ættarliðið av børnum, sum meira ella minni eru fødd við atgongd til internetið, er við at vaksa til, koma eisini kanningarnar, sum vísa á langtíðarárinini av miðlanýtsluni, og úrslitini eru blandað.
Børnini og tey ungu fáa nakrar førleikar, sum eldri ættarlið ikki hava, men tað vísir seg tíverri eisini, at tey fáa trupulleikar, sum ikki vóru eins eyðsæddir fyrr. Millum annað vísa hesar kanningar, at tey ungu ikki halda so nógv um seg sjálvi, tí tey spegla sær í tí perfekta, tey síggja á sosialu miðlunum.
Í einum innslagi á Facebook rópar Katrin Petersen varskó, tí hon heldur at foreldur eiga at duga betur at siga nei, tá tað snýr seg um at geva børnunum atgongd til sosialar miðlar.
- Tað er so ómetaliga trupult at taka atgongdina frá teimum aftur, tá tey fyrst eru komin í gongd við at brúka snildfonirnar, so vit mugu seta inn fyrr og útseta atgongdina til miðlarnar so leingi sum gjørligt, heldur hon.
Thorvald Danielsen, skúlasálarfrøðingur, er samdur.
- Børnini vera í digitala heiminum bombarderað við informatión, sum er órealistisk, har kropsidealir kunnu vera veruleikafjar, men sum børnini spegla sær í allíkavæl.