Familjulív, parlag og sex.

Hetta er nakað av tí, sum tær báðar Marin Jakobsen og Laila Neshamar tosa um í nýggju poddvarpsrøðini Krákan og grísurin. Ein poddur við einum nýggjum parti hvørja viku.

- Vit halda, at tað manglar ein poddur, har mann hoyrir um alt tað, ið mann sum ung mamma kann uppliva. Tá finnur mann eisini útav, at mann er ikki tann einasta við ávísum hugsanum ella kenslum, sigur Marin Jakobsen, sum eins og Laila Neshamar júst nú er í barnsburðarfarloyvi.

Í poddvarpsrøðini leggja tær seg eftir at tosa um nógv av tí, sum flest fólk kenna til, men ikki tora at seta orð á.

- Eitt nú hava vit havt føðiupplivingar, sum gingu alt annað enn væl, og tað er nakað, vit ætla at tosa um, sigur Laila Neshamar. Og longu nú er greitt, hvat evnið verður í poddinum í næstu viku.

- Vit fara at práta um porno, og so fáa vit eisini ein mann inn at siga sína hugsan um porno, sigur Marin Jakobsen.

Í morgunsendingini fortelja Marin og Laila um hugskotið og tankar, sum liggja aftan fyri nýggju poddvarpsrøðina.