Góðan morgun Føroyar

Sjálvt um føroyingar ikki brúka so nógv frímerki longur, so vera tey enn framleidd - tey føroysku frímerkini. Tað nýggjasta er eitt kryptofrímerki, sum bæði hevur eina fysiska og eina talgilda tilveru.

Talgilda kryptofrímerkið er samstundis hitt síðsta hjá Svanbjørg Manai, sum í 47 ár hevur starvast á frímerkjadeildini hjá Posta, og latið bæði føroyingum og útlendingum føroysk frímerki.

Serliga eru tað savnarar uttanlands, sum hava áhuga fyri føroyska frímerkinum, tí tað er eksotiskt.

- Føroyingar hava sjálvandi brúkt frímerki til at senda brøv við, men tað eru savnararnir, sum hava hildið lív í framleiðsluni, sum tó er minkandi. Tey ungu vita ikki eingang hvat eitt frímerki skal brúkast til, og tey, sum byrjaðu at savna frímerki fyri nógvum árum síðan fella frá, so ja, har minkar við kundum, sigur Svanbjørg Manai, ið ikki væntar, at hon fer at keða seg, nú hon fær meira tíð um hendi.