- Evni sum sjálvmorð og deyði hava eitt sindur av power í sær, og tey hava gjøgnumslagskraft. Man verður lagdur til merkis, um man velur tungastu evnini, sum man yvirhøvur kann. Tað pressar áskoðaran til at taka støðu til nøkur ting, sigur Hermann Eliassen, filmsummælari, og leggur afturat, at tá ið man sum ungur filmsleikstjóri byrjar, so vil man fegin, at fólk leggja merki til ein, og tá er lætt at velja eitt av hesum tungu evnunum, sum viðgera lívsins spurningar.

Fleiri av filmunum, sum vóru vístir til Geytan hesa ferð, viðgjørdu evni sum sjálvmorð, deyða og sálarsjúku.

- Tá ið tú gert stuttfilm, hevur tú nakrar aðrar karmar at arbeiða við, og har eru hugskot, sum rigga væl til ein film, sum varar 20 minuttir, men sum ikki høvdu riggað, skuldi søgan verið søgd í einum vanligum spælifilmi.
Í einum stuttfilmi hevur tú frælsi til at royna alt møguligt, sum tú eisini kanst í einari stuttsøgu. Her er størri frælsi at spæla við hugskotum, sum eru nokk so vill.

Eitt av villaru hugskotunum var at finna í filminum 'Død af grin' hjá Terja Mohr, sum eisini vann áskoðaravirðislønina. Her er ein jarðarferð og eitt ervi vent á høvdið, soleiðis, at ikki er loyvt hjá teimum uppmøttu at vera kedd, tí tað hevur familjan avgjørt.