- Tíðindi, mentan og ítróttur
Góðan morgun Føroyar
Nigro Bjarki Hermansen og Oddmar við Korkusá vardu BS-verkætlanina 20. desember í 2017.
Teir gjørdu royndir við at taka lýs á ymsum dýpum við eini pumpu, umframt at teir tóku royndir beint undir vatnskorpuni við glúpi, sum er vanligasta mannagongdin.
Royndirnar vísa, at pumpan er eitt væl egnað amboð til kanningar av lúsum djúpri í sjónum.
Harumframt kann tað vera ein fyrimunur at taka royndir við pumpu um summarið, tá nógvur gróður er í sjónum, sum tippir glúpin.
Royndir vórðu gjørdar við vatnskorpuna og niðri á ávikavist 10 og 20 metra dýpi. Hesar vístu, at lýs vóru á øllum dýpum. Tað skrivar Fiskaaling í tíðindaskrivi.
Vanligt hevur verið, at lúsin er at finna í ovastu fáu metrunum í sjónum.
Kanningarnar, sum teir báðir gjørdu í samstarvi við Fiskaaling vístu, at lúsin var væl djúpari í sjónum, enn higartil hildið.
Tað gekst væl við uppgávuni og teir báðir fingu próvtralið 12.
Vegleiðarar vóru Eilif Gaard frá Havstovani, og Øystein Patursson og Gunnvør á Norði frá Fiskaaling. Próvdómari var Kirstin Eliasen frá Fiskaaling.