Tunnilsmálið: Viðger onga kæru um innlit fyribils

Løgtingsins Umboðsmaður hevur fingið fýra kærur um avgerðirnar hjá Innlendismálaráðnum og Løgmansskrivstovuni um at sýta innlit í málið um sáttmálan, sum er gjørdur við Copenhagen Infrastructure Partners um Eysturoyartunnilin.

Men tey, sum hava kært, skulu ikki vænta nakra avgerð fyribils, tí Umboðsmaðurin hevur avgjørt, at hon tekur ikki støðu til, um kærurnar skulu viðgerast, fyrr enn úrslitið av tingviðgerðini er greitt.

Kann ávirka viðgerðina

Í grundgevingunum sigur Sólja í Ólavsstovu, umboðsmaður, "at tað kann ikki útilokast, at niðurstøðan av eini umboðsmannaviðgerð kann ávirka tingviðgerðina á ein slíkan hátt, at tað onga meining gevur hjá løgtinginum at halda fram at viðgera uppskotið."

- Eg meti ikki, at tað er rætt, at umboðsmaðurin setir embætið ella løgtingið í eina slíka støðu. Eg havi tí avgjørt at útseta eina nærri støðutakan til viðgerðina av klagunum, til úrslitið av tingviðgerðini er greitt, sigur Sólja í Ólavsstovu, umboðsmaður.