Pínustillandi leivdir í frárensluvatni

Umhvørvisstovan hevur kannað, hvussu nógv umhvørvisdálkandi evni úr heilivági og vørum til persónliga røkt, so sum smyrsli, kremi, vaksievni og sjampo eru í Føroyum, Íslandi og Grønlandi.

Í kanningini varð serligur dentur lagdur á øki, har roknast kundi við dálking, t.d. frárensluvatni frá húsarhaldum, vinnuvirkjum og sjúkrahúsum. Greiningar vórðu gjørdar av tilsamans 38 sløgum av heilivági og niðurbrótingarevnum frá heilivági, - eitt nú evnum, sum verða nýtt í vørum til persónliga røkt.

Í kanningini varð salicylsýra, sum stavar frá pínustillandi heilivági so sum Treo og Magnyl, funnin í næstan øllum kannaðu sýnunum, meðan annað slag av heilivági ikki vóru í nøkrum sýni.

Tey evni, sum umframt salisylsýruna oftast komu fyri, vóru evni, sum verða nýtt serliga í reingerðarevnum.

Sum heild varð nøgdin stór av reingingsevnum framvið fjøruni nærhendis reinsiverkinum í Sersjantvíkini í Havn. At lutfalsliga høgar nøgdir av hesum vaskievnum eru í vatni, sum fer á sjógv, kann hava samband við, at vatnreinsiskipanirnar ikki eru nóg góðar - ella at eingin vatnsreinsiskipan er.

Nærri kanningar, sum skulu staðfesta týdningin av hesum fyrstu kanningarúrslitunum, eru í umbúna. Umhvørvisstovan hevur staðið fyri kanningini, sum annars varð stýrd av einum bólki við umboðum frá umhvørvisstovnum og apoteksverkum í teimum trimum londunum.